日日妈妈声2｜紧张大师Kathy被老公点醒 郑衍峰独留港愧对病母

《日日妈妈声》播出已经第4集，23号一集就请嚟周汶锜（Kathy）、郑衍峰（Leonard）、同埋麦秋成担任嘉宾，同大家分享家人相处故事。

同法籍老公育有两子嘅Kathy，就分享中外育儿方法嘅冲突，自认传统嘅Kathy话自己系紧张大师，仲曾喺囝囝学行时为佢戴上头盔，令老公O哂嘴，Kathy话：“老公即时拎走个头盔唔畀再戴，佢话如果你唔畀佢撞吓，就唔知咩系痛，之后我就叮一声醒咗！”

Kathy又话两个囝囝性格大不同，大仔似自己比较保守，细仔就遗传咗老公法国人嘅浪漫基因，佢话：“细仔好热情，系人都锡，每晚要锡一啖嘴仔先瞓觉，真系好sweet，我有时会惊佢大个咁样识女朋友唔得架㖞！”

而郑衍峰就同身处加拿大嘅妈妈隔空对话。入行差唔多6年嘅Leonard，透露自己入行初期并不如意，因而积压唔少压力，仲喺加拿大探望父母期间情绪大爆发，佢话：“嗰次因为工作问题同爹哋妈咪有啲拗撬，之后我发好大脾气同掟嘢，仲崩溃到喊咗出嚟。”

郑妈妈倾听儿子诉说往事，亦忍唔住眼泛泪光，佢亦趁机向家人道歉，场面感人。Leonard又提到妈妈2020年曾接受头部手术，当时佢已即时请飞返加拿大陪妈咪，但Leonard就自责做得唔够好，佢话：“我见到妈咪醒返冇事先返香港，但照顾唔到佢成个康复期，作为独子我觉得自己可以做更多嘢，嗰刻应该要陪妈咪多啲。”

至于新手爸爸麦秋成，就获制作组安排体验“阵痛”酷刑，痛到七情上面嘅佢，仲趁机以爱的宣言向太太汤怡暗示想追多个，佢话：“老婆你生第二胎时，我觉得要陪你多啲，因为真系好辛苦！”

日日妈妈声周汶锜郑衍峰麦秋成