轉自 古巨基LeoKu FB & IG….

阿媽有咗愛回家
大家看了彭導的IG post，應該知道點解我一直都冇出post提及《阿媽有咗第二個》，因為彭導和我有個共識，想留給大家在戲院內有個surprise！

現在原聲大碟也出了，我諗我都可以以歌曲監製嘅角度講少少關於《愛回家》嘅嘢～（至於戲嘅部份還是keep住唔劇透啦，哈～）

去年6月初，彭導邀請我客串佢籌備緊嘅電影，同埋配合劇情想我同姜仔重唱我嘅舊作《愛回家》。呢首歌係我十五年前嘅作品，內容關於外面「風雨」幾大，都「不改」家人對自己嘅愛。

去年8月，正式幫「方晴」錄音。
這天的姜仔沒有化妝整頭，hoodie波鞋，很可愛的一個簡樸男孩。
互相打過招呼，坐在Studio客廳等Engineer準備set up，冇諗過我哋第一個嘅話題係由佢咁樣打開～「我同媽媽睇咗三十幾次你嘅《情深深雨濛濛》！」「如果俾你而家揀，你會揀依萍定如萍？」我睇住佢邊講邊帶好奇嘅笑容，我肯定呢個會同媽媽一齊睇劇嘅男仔，一定可以唱出呢首《愛回家》𥚃面對家人嘅愛。

錄音過程非常順利，姜仔是個領悟很快的歌手，給他提議的表情細節他很快便能拿捏，甚至即學即唱的和音部分都handle得好。
不過，還有一件事讓我非常深刻。

錄音完成後，傾開做音樂嘅嘢，我讚佢每次做歌都有很好嘅概念，佢謙虛地多謝之後，同我分享咗佢當時構思新一首歌嘅千字文，我估應該係佢用來跟填詞人和MV導演表述概念嘅一段文字。後來歌曲面世，我知道那是《鏡中鏡》。

我作為一個多年在做「概念大碟」嘅歌手，我都未試過給各合作單位寫過咁多字嘅概念陳述，看見年紀輕輕的他這麼有想法這麼用心地做音樂，我就知道佢現在嘅成績係花咗好多努力和心血而換來。

電影上映之前，彭導請我去看試片，看到《愛回家》在電影中配合劇情嘅出現，真的很窩心很暖。
我很喜歡彭導的《阿媽有咗第二個》，讓我有太多共鳴和感動。
美鳳與方晴嘅奮鬥勾起了我和太太從前很多一起拼搏嘅畫面；美鳳與子軒讓我想到Kuson一直成長，我應該如何handle父母子女之間嘅溝通。
我相信，每位入場嘅觀眾，都能夠找到屬於自己的共鳴，因為這是一部關於不同形式的愛的電影。

恭喜《阿媽》口碑與票房繼續火爆⭐️
多謝彭導
Thanks for having me ❤️

阿媽有咗第二個愛回家我都好鍾意Alan個編曲彭秀慧Mo姐美鳳姜濤方晴古巨基 基本色-古巨基歌迷会