盧慧敏以長腿做武器 蔡浩然深度拉筋超痛苦

首次拍攝電視劇嘅盧慧敏Amy、蔡浩然Scott同張凱娸，喺警匪劇《叠影狙擊》入面，由於有大量動作場面，所以開拍前佢哋按劇組要求接受一連串特別訓練。
盧慧敏Amy、蔡浩然Scott同張凱娸有份拍警匪劇《叠影狙擊》。攝。

唔好以為舞蹈員出身嘅Scott筋骨就一定最柔軟，導師幫佢嚟個「深度拉筋」時，Scott就不斷露出痛苦表情，事後佢話：「我跳開舞都覺得好辛苦，原來打架俾我想像中複雜好多，所以我完全明白身邊兩位嘅感受，我上完堂返屋企要休息一整日，再用熱水浴腳，條腰勁痛，但我知道娸娸上完堂之後，就連落樓梯都有困難。」

被點名嘅娸娸就露出尷尬笑容：「因為我平時係冇做開運動，上完堂之後，我係坐低、起身、行樓梯，都會發出痛苦嘅聲音，但其實係好事，學多樣嘢，做演員需要好好裝備自己。」

至於喺劇中首次挑戰演奸角嘅Amy，一對長腿就已經係佢最強武器，所以腿功就係佢最需要練嘅部分，Amy解釋：「劇入面我經常要用隻腳去同人打，主要集中訓練雙腿，但原來踢腿用嘅肌肉，同我平日做運動運用嘅肌肉係唔同，真係要練，有排搞。」Amy表示其中一位師傅仲不斷鼓勵佢做第二個楊紫瓊，而呢個時間Amy就會忍住痛同自己講「冇嘢難度佢」而堅持住。