萬千星輝2023｜口水戰！吳若希坤哥瞓身宣傳拉票 戴祖儀呻被背叛：想原地離開

一連兩晚嘅TVB年度盆菜宴於電視城舉行，馬國明、陳展鵬、吳若希、丁子朗、吳業坤、劉佩玥及戴祖儀等眾星雲集，仲有唔夠10日就係TVB萬千星輝頒獎典禮2023舉行大日子，有份主演《香港人在北京》嘅吳若希同吳業坤呢日悉心準備宣傳肩帶同海報為自己拉票，傅嘉莉就舉起易拉架為自己造勢。

一眾入圍最後10強嘅藝人把握機會，不過馬國明笑指好少為自己拉票，但佢會幫自己演嘅4套劇集拉票，馬明又指跟老婆湯洛雯出街時，見到街坊都係恭喜佢新婚，反而好少人同佢講投咗邊套劇，至於生小朋友方面，馬明就話隨緣！

展鵬希望大家今年都有好成績，吳若希笑言唔使同坤哥爭獎，如果唔係佢哋肯定大打出手，吳若希話要瞓身為自己拉票，Chantel（姚焯菲）呢日見坤哥咁有誠意出動易拉架宣傳，佢指一定投坤哥一票。

由於萬千星輝頒獎典禮投票於1月7號截止，傅嘉莉亦有落力宣傳造勢，而戴祖儀就話見到坤哥同吳若希準備充足，戴祖儀笑指感覺被背叛，事前完全冇講，令戴祖儀有啲想原地離開。